Oer Regaad

Regaad meitsje: mei in skjin laai begjinne. Of hoe’t Regaad it sels graach omskriuwt: de boel wat opskodzje, tsjin de stream yn swimme, sjen litte dat it ûnmooglike mooglik is.

Yn novimber 2013 is Regaad oprjochte troch fiif Fryske Grinzers, alle fiif âld-lid fan de Fryske studinteferiening Bernlef. Fiif freonen mei dielde ynteresses, dy’t mei-inoar wat moais meitsje woenen.

De kwaliteit fan boeken koe better. En dan giet it net allinnich om de tekst, mar krekt ek oer it uterlik: omslach, yllustraasjes, papier. En dat is wat Regaad oant hjoed de dei noch altyd docht: noed stean foar álle aspekten fan in boek.

flnr: Peter, Anne Tjerk, Bert René, Erik, Hielke
Fotografy: Jaspar Moulijn

Doel

It doel fan Regaad is dus: moaie boeken meitsje. Mar we ha dêr wol in goede reden foar: we wolle it Frysk lêzen ûnder jongerein befoarderje. Hoe dochst dat? Troch boeken oer te setten dy’t dy doelgroep oansprekke! Unkaputtbare klassikers. Dy’t âlden wol keapje wolle foar harren bern, en dy’t bern ek lêze wolle. Nim bygelyks De GFR: lêswille garandearre, hielendal as der ek noch in moaie bioskoopfilm ferskynt, dat makket de kâns op entûsjasme noch folle grutter. Mar gauris ek in hiel nij hoekje opsykje: horror, ûnfoege ferhalen, doktersromantsjes… Altiten mei lêswille as doel. Dêr giet Regaad foar.

Gearwurkingen

Yn de earste jierren dienen we by Regaad it measte sels, mar wy kamen der al gau efter dat wy it like moai fine om goeie skriuwers, oersetters, yllustratoaren in platfoarm te jaan. Talint de romte en in publyk jaan! Dat is hieltiten sterker ûnderdiel wurden fan ús formule. Regaad jout net samar boeken út. Wy fine it wichtich om der in goed gefoel by te hawwen. By alle aspekten fan it boek. It moat by Regaad passe. Hokfoar gefoel past by in boek? Wat moat der barre ast in boek beet hâldst? Hokfoar sfear moat it hawwe? Dêr tinke we oer nei, en op basis fan sokke fragen sykje wy altyd de bêste minsken by it boek.

Skriuwers/oersetters wêrmei’t Regaad graach gearwurket:

Aant-Jelle Soepboer, Ammerins Moss – De Boer, Douwe Kootstra, Jan Popkema, Henk Wolf, Geart Tigchelaar, Martsje de Jong, Willem Schoorstra, Rymke Zijlstra, André Looijenga, Tryntsje van der Steege, Meindert Talma.

Yllustratoaren wêrmei’t Regaad graach gearwurket:

Douwe Dijkstra, Hilda Groenesteyn, Nina Peckelsen, Roelof Wijtsma, Tony Roberts, Kim Hunnersen.

wat minsken sizze oer regaad:

"Regaad is in batshit-crazy útjouwerij. Ferjou my it Angelsaksysk, mar it koe net oars. Hiel moai dat d'r in klup is dy't apart wurk beskikber makket. Sels yn in pandemy betinke sy noch in omwei."

"De minsken efter Utjouwerij Regaad hâlde hertstochtlik fan boeken, en se binne net gau benaud. Mei tank oan de eigensinnige oersetting en de spirituele cover ha se fan Ventoux in boek makke dat suver better is as it orizjineel."

"Myn gearwurking mei Regaad fielde foar my as kattekwea úthelje mei in groep bêste maten. It joech deselde enerzjy as doe't wy eartiids stikem beltsjedrukten of pylkjeskeaten, mar no tsjinne it in goed doel: moaie boeken en it Frysk. It bêste heuch ik my de Horrortour doe't wy mei in oaljelampke doarpshuzen grizelje lieten."

"Geweldig dat mijn Harlequin roman door Uitgeverij Regaad in het Fries is uitgegeven. Dankzij de goede en persoonlijke samenwerking met Regaad is Leafde yn Ljouwert in groot succes geworden!"

"Slach Regaad op Regaad - dêr sitte priiswinners."

"Ik boek oersette/útjaan yn 'e mande mei Regaad is suver in lyts feestje. De mannen hawwe each foar taal, styl, byld, foarmjouwing en folle net genôch. Sa komme se alle kearen wer ta de moaiste útjeften."

"Regaad stiet foar bysûndere, kwalitative útjeften. Dyselde omskriuwing jildt ek foar de gearwurking tusken útjouwerij en meiwurker: kleare klasse!"

Deze zeer sympathieke uitgeverij gaat tot het uiterste in het maken van mooie boeken en het veraangenamen van vergaderingen met behulp van serieus bier en excellente worst.

Regaad makke fan my yn ien bierfeest in oersetter. Mei in bulte wille en kreativiteit fan in klassiker in hiel nij en bysûnder boek meitsje, dát fynst nergens oars.

“De jonges fan Regaad meitsje it op in noflik eigensinnige wize mooglik dat der prachtich fersoarge oersettingen fan de moaiste boeken yn it Frysk te lêzen binne, it is in nocht om dêroan mei te wurkjen. “

Bert-René Luimstra

Bert-René Luimstra is yn it hjoeddeistich libben businessanalist. Hy giet mei minsken yn petear om te sjen oft se allegear deselde taal prate. In kommunikative baan, en dat slút moai oan op Regaad. Wat is no de kearn fan it ferhaal? En by Regaad kin Bert-René dêr al syn kreativiteit tsjinoan goaie.

Anne Popkema

Anne Popkema neamt himsels in breafries: hy libbet fan de Fryske taal. Hy docht ûnder oaren in protte ûndersyk en jout les oan studinten. Regaad is foar Anne ‘in boarterstún dêr’t je dingen dwaan kinne dy’t je op oare plakken net dwaan kinne: frij fan beheiningen. Yn frijheid komme de moaiste dingen.’

Peter Boersma

Peter Boersma is foarmjouwer en hat in eigen ûntwerpburo. Hy wurket foar in soad útjouwers, mar kin by Regaad noch folle mear syn eigen gong gean. Frijheid yn de foarmjouwing. En dat fynt er moai.

Hielke Visser

Hielke Visser hat in finansjele, liedingjaande funksje yn it bedriuwslibben. Saaklik en drûch, mar hy fynt it wol moai. Regaad hat foar Hielke in maatskiplike funksje en dy kombinaasje fielt goed. Kwaliteit ôfleverje mei dyn maten, dêr krijst enerzjy fan.

Erik de Vries

Erik de Vries hat ek in finansjele funksje, as controller. Hy fynt it moai om oeral wei kennis en kunde byinoar te bringen en in útjouwerij draaiende te hâlden. In útsûnderlike hobby, dy’t de wrâld krekt even wat moaier makket.

Oer regaad